ប្រែសម្រួល៖ រតនា

ញូវដែលី៖ ផ្នែកព័ត៌មានឌីជីថលរបស់មហាសេដ្ឋីឥណ្ឌា Gautam Adani និង Mukesh Ambani និងក្រុមព័ត៌មានផ្សេងទៀតដូចជា Indian Express និង Hindustan Times បានដាក់បណ្តឹងប្រឆាំងនឹងការប្រើប្រាស់មិនត្រឹមត្រូវនូវខ្លឹមសារកម្មសិទ្ធិបញ្ញារបស់ OpenAI ដូចបានបង្ហាញក្នុងឯកសារផ្លូវច្បាប់។

ក្រុមប្រព័ន្ធផ្សព្វផ្សាយរួមទាំង NDTV របស់លោក Adani និង Network18 របស់លោក Ambani បានប្រាប់តុលាការនៅញូវដែលីថា ពួកគេចង់ចូលរួមក្នុងបណ្តឹងដែលកំពុងបន្តប្រឆាំងនឹងក្រុមហ៊ុនបង្កើត ChatGPT ដោយសារពួកគេមានការព្រួយបារម្ភថា គេហទំព័រព័ត៌មានរបស់ពួកគេកំពុងត្រូវបានគាស់យកដើម្បីរក្សាទុក និងផលិតឡើងវិញនូវស្នាដៃរបស់ពួកគេសម្រាប់អ្នកប្រើប្រាស់ឧបករណ៍ AI ដ៏មានឥទ្ធិពលនេះ។

Reuters ជាអ្នករាយការណ៍ដំបូងគេអំពីការដាក់បណ្តឹងនេះដោយក្រុមអ្នកបោះពុម្ពផ្សាយព័ត៌មានឌីជីថល ដែលបង្កើនភាពតានតឹងនៃជម្លោះផ្លូវច្បាប់ដែលកំពុងបន្តប្រឆាំងនឹង ChatGPT នៅឥណ្ឌា។ ក្នុងជម្លោះដ៏សំខាន់បំផុតមួយ ភ្នាក់ងារព័ត៌មានក្នុងស្រុក ANI គឺជាអ្នកដំបូងគេដែលបានដាក់បណ្តឹងប្រឆាំងនឹង OpenAI កាលពីឆ្នាំមុន។ ក្រុមបោះពុម្ពផ្សាយសៀវភៅសកលនិងឥណ្ឌាក៏បានចូលរួមផងដែរឥឡូវនេះ។

ឯកសារបណ្តឹង ១៣៥ ទំព័រនៅក្នុងតុលាការញូវដែលី ដែលមិនមែនជាសាធារណៈ ប៉ុន្តែត្រូវបានពិនិត្យដោយ Reuters បានអះអាងថា ការប្រព្រឹត្តរបស់ OpenAI បង្កើតឲ្យមាន “គ្រោះថ្នាក់ច្បាស់លាស់និងបច្ចុប្បន្នចំពោះកម្មសិទ្ធិបញ្ញាដ៏មានតម្លៃ” របស់សមាជិកសមាគមអ្នកបោះពុម្ពផ្សាយព័ត៌មានឌីជីថល (DNPA) និងក្រុមផ្សេងទៀត។

ឯកសារនោះសំដៅលើ “ការគាស់យកដោយចេតនា… និងការកែប្រែខ្លឹមសារ” របស់ OpenAI។

តុលាការជុំវិញពិភពលោកកំពុងស្តាប់ការទាមទាររបស់អ្នកនិពន្ធ ក្រុមព័ត៌មាន និងតន្ត្រីករដែលចោទប្រកាន់ក្រុមហ៊ុនបច្ចេកវិទ្យាថាបានប្រើប្រាស់ស្នាដៃកម្មសិទ្ធិបញ្ញារបស់ពួកគេដើម្បីបណ្តុះបណ្តាលសេវាកម្ម AI និងដែលកំពុងស្វែងរកការលុបចោលខ្លឹមសារដែលត្រូវបានប្រើដើម្បីបណ្តុះបណ្តាលកម្មវិធីជជែកកម្សាន្តនេះ។

បណ្តឹងនេះត្រូវបានធ្វើឡើងដោយ Indian Express, Hindustan Times, NDTV របស់លោក Adani និង DNPA ដែលតំណាងឲ្យក្រុមហ៊ុនប្រមាណ ២០ រួមទាំង Network18 របស់លោក Mukesh Ambani និងក្រុមហ៊ុនផ្សេងទៀតដូចជា Dainik Bhaskar។ ក្រុមព័ត៌មានជាច្រើនក្នុងចំណោមនេះក៏មានអាជីវកម្មកាសែត និងព័ត៌មានទូរទស្សន៍ដែលកំពុងរីកចម្រើនផងដែរ។

Times of India មិនចូលរួមក្នុងការប្រឈមមុខផ្លូវច្បាប់នេះទេ ទោះបីជាខ្លួនជាសមាជិកនៃ DNPA ក៏ដោយ។

OpenAI មិនបានឆ្លើយតបនឹងសំណើសុំការអធិប្បាយលើការចោទប្រកាន់ថ្មីនេះទេ។ ក្រុមហ៊ុននេះបានបដិសេធការចោទប្រកាន់បែបនេះជាច្រើនដង ដោយនិយាយថាប្រព័ន្ធ AI របស់ខ្លួនធ្វើការប្រើប្រាស់ដោយត្រឹមត្រូវនូវទិន្នន័យដែលមានជាសាធារណៈ។

គ្មានក្រុមហ៊ុនប្រព័ន្ធផ្សព្វផ្សាយឥណ្ឌាណាមួយបានឆ្លើយតបភ្លាមៗនឹងសំណើសុំការអធិប្បាយពី Reuters ទេ៕

ប្រភព៖ Reuters